Dame, a vous sans retollir

Dame, a vous sans retoillir
Dong cuer, pensèe, desir,
corps et amor,
Comme a toute la millour
Qu’on puist choisir
Ne qui vivre ne morir
Puist a ce jour.

Si ne me doit a folour
Tourner, se je vous aour
Car sans mentir,
Bonte passes en valour,
Toute flour en douce odour
qu’on puet sentir.
Votre biaute fait tarir
Toute autre et anientir,
Et vo doucour passé tout;
rose en colour
Vous doi tenir,
Et vo regars puet garir
Toute dolour.

Pour ce, dame je m’atour
De tres toute ma vigour
A vous servir,
Et met sans nul villain tour,
Mon cuer, ma vie et m’onnour
En vo plaisir.
Et se pitè consenter
Wuet que me daigniez oir
En ma clamour,
Je ne quier de mon labour
Autre merir,
qu’il ne me porroit venire
Joie gringnour.

Dame, ou sont tuit mi retour,
Souvent m’etuet en destour
Pleindre et gemir,
Et, present vous, descolour,
quant vous ne savez l’ardour
qu’ay a souffrir
Pour vous qu’aim tant et desir,
que plus ne le puis couvrir.
Et se tenrour
N’en avez, en grant tristour
M’estuet fenir.
Nompourquant jusqu’au morir
Vostres demour.